Pwyllgor Materion Cymreig yn edrych ar effaith cysylltiadau masnach ar ôl Brexit ar economi Cymru

8 March 2018

Bydd y Pwyllgor Materion Cymreig yn parhau gyda'i ymchwiliad i Brexit: amaethyddiaeth, masnach ac ailwladoli pwerau ddydd Mawrth 13 Mawrth, mewn sesiwn gyda'r Athro Nicholas Perdikis o Brifysgol Aberystwyth.

Yn 2016, allforiwyd ychydig dros £14.6 biliwn o nwyddau o Gymru, gydag £8.85 biliwn o'r cyfanswm yn mynd at aelod-wladwriaethau'r UE a £5.15 biliwn at wledydd y tu allan i'r UE. Daeth yr allforion o ystod eang o sectorau, gyda pheirianwaith ac offer trafnidiaeth yn feysydd arbennig o werthfawr.

Yn ystod y sesiwn, disgwylir i'r Pwyllgor gwestiynu'r Athro Perdikis – Athro Busnes Rhyngwladol, Prifysgol Aberystwyth - ar effaith polisi masnach y DU yn y dyfodol ar economi Cymru - am y blaenoriaethau gwahanol sydd gan sectorau allforio Cymru, pwysigrwydd mewnforion i economi Cymru a sut allai'r gwahanol opsiynau ar gyfer polisi masnach y DU yn y dyfodol effeithio ar economi Cymru yn ei chyfanrwydd.

Tystion

Dydd Mawrth 13, Ystafell Thatcher, Portcullis House, San Steffan

2.15yh

Yr Athro Nicholas Perdikis, Athro Busnes Rhyngwladol, Prifysgol Aberystwyth

Sylwadau'r Cadeirydd

Dywedodd Cadeirydd y Pwyllgor David T.C. Davies AS cyn y sesiwn:

"Wedi clywed gan nifer o sectorau allweddol o Gymru yn ystod yr ymholiad, bydd y Pwyllgor yn canolbwyntio nawr ar sut gallai newidiadau i bolisi masnach y DU yn y dyfodol o ganlyniad i Brexit gael effaith ar economi Cymru yn ei chyfanrwydd.
Ceir nifer o senarios posib ar gyfer cysylltiadau masnach y dyfodol gyda gwledydd y tu fewn a thu allan i'r UE, ac edrychwn ymlaen at gael clywed gan yr Athro Perdikis am beth allai'r senarios hyn olygu i fewnforio ac allforio yng Nghymru."

Gwybodaeth bellach

Delwedd: Creative Commons CC0